VI RESPÝBLIKALYQ IMAMDAR FORÝMYNYŃ ÚNDEÝI QABYLDANDY
Búgin Astana qalasynda Qazaqstan musylmandary dinı basqarmasynyń uıymdastyrýymen «Qazaq dalasyndaǵy dástúrli ıslam qundylyqtary» VI Respýblıkalyq ımamdar forýmy forýmynyń úndeýi qabyldandy. Úndeýdi QMDB «Din men dástúr» bóliminiń meńgerýshisi Nurbek Áýeshanuly oqyp berdi.
Biz, Qazaqstan musylmandary dinı basqarmasynyń uıymdastyrýymen «Qazaq dalasyndaǵy dástúrli ıslam qundylyqtary» VI Respýblıkalyq ımamdar forýmyna qatysýshy din jáne qoǵam qaıratkerleri, zııaly qaýym ókilderi, Ǵulamalar keńesiniń músheleri men Oblys ımamdary «Qazaq halqynyń rýhanı negizin qalaǵan dástúrli ıslam qundylyqtaryn dáripteı otyryp, el ishindegi dinı turaqtylyq pen ulttyq biregeılikti saqtaý isinde ımamdardyń jaýapkershiligi men rólin arttyrýdy asa mańyzdy» dep sanaımyz.
Osy forým aıasynda qoǵamnyń rýhanı damýyna úles qosatyn eki mańyzdy qujat qabyldandy:
«Qazaq halqynyń dástúrinde jáne Islam dininde otbasy qundylyǵy» tuǵyrnamasy – otbasy ınstıtýtynyń Islamdaǵy orny men jaýapkershiligin naqtylap, ata-ana men urpaq arasyndaǵy baılanysty nyǵaıtýdy, ımandy, tárbıeli ári bilimdi urpaq ósirýdi basty murat etken tuǵyrly ustanym.
Al «Qudaıy asta ysyrapqa jol bermeý» qujaty –
Qudaıy as berýde qarapaıymdylyqty saqtaý, sharıǵat pen ulttyq dástúr úılesimin qalyptastyrý, qoǵamda kórinis berip otyrǵan ysyrapshyldyq pen básekelestiktiń aldyn alý baǵytynda jol kórsetetin mańyzdy qujat.
Biz, forýmǵa qatysýshylar, osy qujattarda qamtylǵan máselelerdi el ishinde keńinen nasıhattap, halyq arasynda sharıǵat pen salttyń sabaqtastyǵyna negizdelgen birizdilik pen jaýapkershilikti qalyptastyrý negizinde tómendegi úndeýdi qabyldaımyz:
Birinshiden, otbasy qundylyǵyn saqtaýda, asyl dinimiz ben salt-dástúrimizde kórsetilgen er men áıeldiń ózine júktelgen mindetteri men urpaq tárbıesine baǵyttalǵan jumystardy júıeli túrde júrgizýge,
Ekinshiden, Qudaıy as berýde ysyrapqa jol bermeýge, dinimiz ben dástúrimizdi ushtastyra otyryp, qarapaıymdylyqqa mán berýge,
Úshinshiden, Qazaqstan qoǵamynda dástúrli ıslamnyń orny men qundylyǵyn saqtaý jolynda ulttyq, rýhanı tutastyqtyń tiregine qyzmet etýde belsendi bolýǵa shaqyramyz» delingen úndeýde.
Aıta keteıik, forýmaǵa Qazaqstan Respýblıkasynyń Mádenıet jáne aqparat vıtse-mınıstri Qanat Jumabaıuly, QMDB Tóraǵasy, Bas múftı Naýryzbaı qajy Taǵanuly, Ǵulamalar jáne Sarapshylar keńesiniń músheleri, medrese-kolledj ben qarılar ortalyǵynyń dırektorlary, sondaı-aq elimizdiń ár aımaǵynan onlaın jáne oflaın formatta 1000-ǵa jýyq ımam qatysty.
