VI RESPÝBLIKALYQ IMAMDAR FORÝMY BASTALDY

Búgin Astana qalasynda Qazaqstan musylmandary dinı basqarmasynyń uıymdastyrýymen «Qazaq dalasyndaǵy dástúrli ıslam qundylyqtary» VI Respýblıkalyq ımamdar forýmy bastaldy.

Forýmǵa Qazaqstan Respýblıkasynyń Mádenıet jáne aqparat vıtse-mınıstri QMDB Tóraǵasy, Bas múftı Naýryzbaı qajy Taǵanuly, Ǵulamalar jáne Sarapshylar keńesiniń músheleri, medrese-kolledj ben qarılar ortalyǵynyń dırektorlary, sondaı-aq elimizdiń ár aımaǵynan onlaın jáne oflaın formatta 1000-ǵa jýyq ımam qatysýda.

Igi is-shara Qazaqstan Respýblıkasynyń memlekettik gımnimen bastalyp, qasıetti Quran aıatymen ashyldy. Odan keıin múftııattyń jyl basynan beri atqarǵan is-sharalary týraly beınerolık kórsetildi.

Forým baǵdarlamasyna sáıkes «Qazaq halqynyń dástúrinde jáne Islam dininde otbasy qundylyǵy», «Qudaıy as berýde ysyrapqa jol bermeý (máziri men tártibi)» tuǵyrnamasy qujattary qaralyp, qabyldanbaq. Basqosý sońynda forým Úndeýi jarııalanady.

​