QMDB TÓRAǴASY ÁLEM MUSYLMANDARYN RÝHANI BIRLIKKE ÚNDEDI
Búgin Fınlıandııa astanasy Helsınkı qalasyndaǵy Ortalyq meshitte ýaǵyz aıtqan Bas múftı Naýryzbaı qajy Taǵanuly álem musylmandaryn birlikke shaqyrdy.
«Islam dini musylmandardy árdaıym birlikke úndeıdi. Paıǵambarymyz (oǵan Allanyń salaýaty men sálemi bolsyn) bylaı degen: «Bir-birińdi jek kórmeńder, qyzǵanbańdar, teris aınalmańdar! Allanyń quldary, baýyr bolyńdar!». Shetelde júrgen musylman qaýymy úshin birlik – erekshe mańyzdy. Birligi bar jamaǵattyń berekesi bolady. Ǵalymdarymyz birlikti jaıqalǵan toǵaıǵa teńegen. Butaǵy kóbeıgen saıyn ol jelge qarsy berik turady. Sol sııaqty birligi bar qaýym da qandaı jaǵdaıda bolsa da óz bolmysyn saqtaı alady. Birlik júrekten bastalady. Júrekte súıispenshilik bolsa, qoǵamda tatýlyq bolady. Júrekte qurmet bolsa, ortada bereke bolady. Sondyqtan qaı elde júrsek te birligimizdi saqtaıyq. Bir-birimizge janashyr bolaıyq. Jastarymyz ımandy bolyp ósýine birge úles qosaıyq» dedi Naýryzbaı qajy Taǵanuly.
