QMDB: ELIMIZDE 21 528 OQÝShYǴA MEKTEP QURALDARY BERILDI (FOTO)
Jyldaǵy dástúr boıynsha tamyz aıynyń basynda Qazaqstan musylmandary dinı basqarmasynyń tóraǵasy Naýryzbaı qajy Taǵanulynyń bastamasymen «Mektepke jol» aktsııasy jarııalanǵan bolatyn. Jańa oqý jylyna daıyndyq kezeńinde uıymdastyrylǵan qaıyrymdylyq aktsııasy búgin qorytyndylandy.
QMDB «Zeket jáne qaıyrymdylyq» qorynyń málimetine súıensek, bıyl respýblıka boıynsha 21 528 oqýshyǵa mektepke qajetti oqý quraldary salynǵan sómke úlestirildi. Bul 2022 jylǵy aktsııamen salystyrǵanda 3655 oqýshyǵa kóp. Sondaı-aq 302 balaǵa mektep formasy jáne 44 balaǵa 580 myń teńge kóleminde qarjylaı kómek berildi.
Aıta keteıik, mektepke qajetti oqý quraldary kópbalaly otbasylar men múgedektigi bar balalarǵa jáne áleýmettik jaǵynan az qamtylǵan otbasylardyń mektep jasyndaǵy balalaryna tartý etildi. Óz kezeginde ata-analar men oqýshylar aktsııany uıymdastyrýshy QMDB «Zeket jáne qaıyrymdylyq» qory men meshit ımamdaryna rızashylyǵyn jetkizdi.
Qaıyrymdylyq aktsııasyna qoldaý bildirip, demeýshilik kórsetken kásipker azamattarǵa, meshit janashyrlary men jamaǵatqa, el turǵyndaryna alǵysymyzdy bildirip, eńbegine bereke, otbasylaryna amandyq tileımiz!
