«IMANI JAZ-2025»: ULTTYQ MÝZEIGE SAIaHAT – ShÁKIRTTERGE TAǴYLYMDY KÚN (FOTO)

Astana qalasyndaǵy «Áziret Sultan» meshitinde ótip jatqan «Imanı jaz-2025» jazǵy saýat ashý kýrsy aıasynda shákirtter elordadaǵy Ulttyq mýzeıge saıahat jasap qaıtty.

Kýrstyń mańyzdy baǵyttarynyń biri – balanyń tek dinı bilim alyp qana qoımaı, rýhanı, tarıhı jáne mádenı tanymyn arttyrý. Osy maqsatta meshit ustazdarynyń uıymdastyrýymen shákirtter elorda tórinde ornalasqan Qazaqstan Respýblıkasynyń Ulttyq mýzeıine arnaıy saıahat jasady.

Dástúrli túrde jyl saıyn ótkizilip kele jatqan bul bastama – jas býynǵa ata-babalarymyzdyń tarıhyn tereńirek tanystyrýǵa, eldik sanany qalyptastyrýǵa baǵyttalǵan. Balalardyń bilimin syrtqy ómirmen baılanystyra otyryp jetildirý – «Imanı jaz» jobasynyń negizgi ustanymdarynyń biri.

Saıahat barysynda shákirtter Qazaqstan tarıhynan syr shertetin kóne jádigerlerdi, mádenı muralardy, Etnografııalyq buıymdardy, qundy arheologııalyq tabystardy óz kózderimen kórip, tańdanys pen qyzyǵýshylyqqa toly áser aldy. Mýzeı ishindegi árbir zal – bir kezeńniń shejiresi ispetti. Bul zaldardy aralaý barysynda balalar halqymyzdyń sonaý saq, ǵun, túrki kezeńderinen bastap qazirgi Táýelsiz Qazaqstanǵa deıingi tarıhı jolyn kózben kórip, kókeılerine toqydy.

Shara barysynda meshit ımamdary men ustazdary ár Eksponattyń mańyzy men tarıhı mánin túsindirip, shákirttermen suraq-jaýap, pikir almasý syndy belsendi formatta jumys júrgizdi. Bul balalardyń este saqtaý qabiletin damytýǵa, synı oılaý men tarıhı oqıǵalarǵa degen qyzyǵýshylyǵyn oıatýǵa sep boldy.

«Imanı jaz-2024» kýrsy áli birneshe apta jalǵasady. Alda shákirtter úshin Quran jattaý, dinı bilim alý, túrli oıyn-saıystar, sporttyq jarystar jáne ózge de tárbıelik is-sharalar uıymdastyrylmaq. Al búgingi «Tarıhtan taǵylym» saıahaty shákirtterdiń júreginde erekshe áser qaldyryp, olardyń rýhanı jáne mádenı dúnıetanymyn tereńdete tústi.

Sýretterdi «FOTOGALEREIa» aıdarynan kóre alasyzdar!

Источник: Aidos