«IMAN» JÝRNALYNYŃ 4-NÓMIRINEN NE OQIMYZ?
Qazaqstan musylmandary dinı basqarmasynyń tól basylymy «Iman» jýrnalynyń sáýir aıyndaǵy nómiri 23 sáýir – Ulttyq kitap kúnine oraı «Jan azyǵy» taqyrybyna arnalmaq.
Oqyrman qaýym jańa nómirden kitap oqýdyń mańyzy men paıdasyna qatysty tartymdy maqalalarmen tanysa alady. Máselen, sáýir aıynyń jýrnaly «Bas múftı minberi» aıdaryndaǵy QMDB Tóraǵasy Naýryzbaı qajy Taǵanulynyń «Kitap – danalyq baspaldaǵy» maqalasymen bastaldy. Sharıǵı redaktor Medet Qurmashuly qasıetti Quran Kárim jaıly jazsa, QMDB janyndaǵy Islam ǵylymı-zertteý ınstıtýtynyń dırektory Tóráli Qydyr «Qoljazbadan lıtografııaǵa deıin» ǵylymı-tanymdyq maqalasyn jarııalady.
Jýrnaldyń bas redaktory Keýlimjaı Qutty «Kitap oqýdyń 5 paıdasyn» jáne «Álemdik kitap saýdasyna» arnaıy toqtaldy. Sondaı-aq, jýrnaldan «Muftiyat» baspasynyń dırektory Batyrjan Mansurovtyń suhbatyn oqyp, osy kúnge deıin jaryq kórgen «Muftiyat baspasynyń kitaptarymen» tolyǵyraq tanysýǵa múmkindik bar. Budan bólek, balalardy kitap oqýǵa úıretý men jastar qaýymynyń kitapqa áýes bolýynyń mańyzy aıtylǵan maqalalar da jarııalandy. Sonymen qatar, qazirgi din qyzmetkerleriniń kitapqa kóńil bólýi saralanǵan «Imamdar qandaı kitap oqıdy?» maqalasy oqyrmanǵa oı salady dep senemiz.
