Elordada Bas múftıdiń qatysýymen áıel-qyzdarǵa arnalǵan aýqymdy forým ótti
«Áziret Sultan» meshitinde QMDB Tóraǵasy, Bas múftı Naýryzbaı qajy Taǵanulynyń qatysýymen qyz-kelinshekterge arnalǵan «Áıel – adal qoǵam tiregi» taqyrybynda aýqymdy rýhanı-tanymdyq forým ótti.
Sonymen qatar jıynǵa Astana qalasynyń jáne «Áziret Sultan» meshitiniń bas ımamy Erbolat Júsipov, Áıel-qyzdar sektorynyń meńgerýshisi Dınara Qutqojaqyzy, Astana qalasy Áıel-qyzdar sektorynyń jetekshisi Kúlsara Mamyrqyzy, Respýblıkalyq Bas meshit ustazy Qarlyǵash Qajymálikqyzy, elorda ustazdary, meshitterdiń áıel shákirtteri men jamaǵaty qatysty.
Forýmda sóz sóılegen Bas múftı otbasy tárbıesi, ananyń urpaq tárbıesindegi jaýapkershiligi jáne ulttyq ári rýhanı qundylyqtardy saqtaý máselelerin keńinen sóz etti. Sonymen qatar adal qoǵam qalyptastyrýdaǵy áıeldiń róli, otbasy birligi men tárbıeniń mańyzy jóninde taǵylymdy oılar aıtyldy.
QMDB Tóraǵasy áıeldiń qoǵamdaǵy orny men otbasy tárbıesindegi róline toqtalyp, qyz-kelinshekterdiń rýhanı bilim alyp, kórkem minez ben izgi tárbıeni qatar ustanýy mańyzdy ekenin jetkizdi. Sonymen qatar bıylǵy «Islam jáne adal qoǵam» jyly aıasynda elimizde ótip jatqan is-sharalardyń negizgi maqsaty qoǵamda adaldyq pen jaýapkershilik qundylyqtaryn qalyptastyrý ekenin atap ótti.
Forým aıasynda spıkerler qyz-kelinshekterdi bilim alýǵa, rýhanı izdeniske jáne kórkem minezdi bolýǵa úndep, qazirgi qoǵamdaǵy otbasy qundylyǵy men áıel tárbıesiniń ózektiligine toqtaldy. Sondaı-aq jastar tárbıesi, otbasyndaǵy syılastyq pen qoǵamdaǵy ádep máseleleri de nazardan tys qalmady.
Forým rýhanı nasıhatqa toly áserli kezdesýge ulasyp, jınalǵan jamaǵatqa erekshe taǵylym syılady. Jıyn sońynda el amandyǵy men otbasy berekesi úshin duǵa jasalyp, qatysýshylarǵa izgi tilekter aıtyldy.
Sýretterdi tolyǵyraq «Fotogalereıa» aıdarynan kóre alasyz!
