Bas múftı qatysqan rýhanı keshte myńdaǵan shákirt marapattaldy

Astana qalasy ókildiginiń uıymdastyrýymen «Áziret Sultan» meshitinde «Imanı túlek» atty meshit shákirtterine arnalǵan saltanatty marapattaý keshi ótti. Rýhanı keshke elorda meshitterinde bilim alyp júrgen 1 200 shákirt qatysty.

Is-sharaǵa QMDB Tóraǵasy, Bas múftı Naýryzbaı qajy Taǵanuly arnaıy qatysyp, shákirtterge nasıhat aıtty.

Sonymen qatar jıynǵa Astana qalasynyń jáne «Áziret Sultan» meshitiniń bas ımamy Erbolat Júsipov, QMDB Áıel-qyzdar sektorynyń meńgerýshisi Dınara Qutqojaqyzy, Astana qalasy Áıel-qyzdar sektorynyń jetekshisi Kúlsara Mamyrqyzy, Respýblıkalyq Bas meshit ustazy Qarlyǵash Qajymálikqyzy, elorda ustazdary, áıel shákirtter men jamaǵat qatysty.

Bas múftı óz sózinde Islam dininde bilim alýdyń orny erekshe ekenin atap ótip, Qurannyń alǵashqy túsken aıaty «Oqy!» dep bastalǵanyn eske saldy. Sondaı-aq Paıǵambarymyzdyń ﷺ «Bilimdi talap etý – árbir musylmanǵa paryz» degen hadısin keltirip, ilim izdeýdiń árbir musylman er men áıelge ortaq mindet ekenin aıtty.

Bas múftı bıylǵy «Islam jáne adal qoǵam» jyly aıasynda elimizdiń barlyq óńirinde rýhanı-aǵartýshylyq baǵyttaǵy aýqymdy is-sharalar ótip jatqanyn atap ótti. Onyń aıtýynsha, qoǵamdaǵy adaldyq, jaýapkershilik pen kórkem minez máselesi árbir musylmannyń ómirinde aıryqsha oryn alýy tıis.

Jıyn barysynda meshitterde bilim alyp júrgen shákirtterge arnaıy sertıfıkattar men marapattar tabystalyp, ustazdarǵa alǵys aıtyldy. Kesh sońynda el amandyǵy men jurt tynyshtyǵyna duǵa jasaldy.

Sýretterdi tolyǵyraq «Fotogalereıa» aıdarynan kóre alasyz!

Источник: Aisha