BAS MÚFTI HELSINKI MEShITINDE JUMA ÝAǴYZYN AITTY
Búgin qasıetti juma kúni Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Fınlıandııa Respýblıkasyna barǵan saparynda osy eldiń astanasy Helsınkı qalasyndaǵy Ortalyq meshitte juma ýaǵyzyn aıtty.
«Ata jurttan jyraqta júrgen musylman úshin din tek qulshylyq emes. Ol – rýhanı tirek, ulttyq bolmysty saqtaıtyn amanat. Sizder jat elde júrip adal eńbekterińizben, kórkem minezderińizben Islamnyń asyl qundylyqtaryn tanytyp kelesizder. Bul – úlken saýapty is. Eýropada ómir súrip jatqan musylman úshin úsh úlken amanat bar: birinshisi – dindi saqtaý, ekinshisi – ana tilin saqtaý, úshinshisi ulttyq tárbıeni saqtaý. Bul – bizdiń urpaq aldyndaǵy jaýapkershiligimiz. Paıǵambarymyz (oǵan Allanyń salaýaty men sálemi bolsyn) bir hadısinde bylaı degen: «Múminder bir-birine súıispenshilik pen meıirimdilikte bir dene tárizdi». Sondyqtan alysta júrsek te júregimiz bir bolsyn. Bir-birimizge tirek bolaıyq. Jastarymyzǵa durys baǵyt bereıik. Balalarymyzǵa ana tilimizdi, dinimizdi úıreteıik» dedi Bas múftı Naýryzbaı qajy Taǵanuly.
Sondaı-aq QMDB Tóraǵasy juma namazyn ótkizip, barsha musylmannyń ıgiligi úshin duǵa etti. Juma namazyna qatysqan musylman jamaǵaty Helsınkı qalasynda alǵash ret ýaǵyz aıtqan Bas múftıge alǵysy men rızashylyq nıetterin jetkizdi.
