«ÁZIRET SULTAN» MEShITINDE JAMAǴATPEN QURBAN AIT NAMAZY OQYLDY (FOTO)

«Áziret Sultan» meshitinde jamaǵatpen qurban aıt namazy oqyldy. Jamaǵatqa ýaǵyzymen ulyq merekeniń mán-mańyzyn túsindirgen QMDB  tóraǵasynyń orynbasary, naıb múftı Ermek Qasbolatuly Muqataı Qurban aıtqa baılanysty ár musylman qaperde ustaýy qajet bolǵan jaıyttardy tarqatyp aıtty.   

«Áziret Sultan» meshitiniń naıb ımamy Jumanazar Óserhanuly jamaǵatqa aıt namazyn oqýdyń úlgisin tanystyryp, jamaǵatty qulshylyqqa den qoıýǵa shaqyrdy. Artynsha aıt namazy men qutpasy oqylyp, jamaǵatpen duǵa-tilekter jasaldy. Elorda jurtshylyǵy tós qaǵysyp, qol alysyp birin-biri merekemen quttyqtap jatty.

Aıta ketsek, búgin Qurban aıttyń birinshi kúni. «Aıt» sózi arab tilinde «oralý», «meıram», «qýanyshty kún» degendi bildiredi. Ábý Hanıfa mázhabynda qurban aıt namazyn oqý árbir musylmanǵa – ýájip. Paıǵambarymyz (s.ǵ.s) ómiriniń sońyna deıin aıt namazyn tastamaǵandyǵy jáne Quran kárimde: «Rabbyń úshin namaz oqy, qurban shal» («Káýsar»súresi, 2-aıat.) , - dep buıyrǵan. Oraza jáne qurban aıt namazdary alǵash ret Alla elshisi Muhammed (s.ǵ.s.) Mádıne shaharyna qonys aýdarǵan jyly oqylǵan. Sondyqtan bul meıram aıt namazyn oqýmen bastalady. Aıt namazy –juma namazy paryz bolǵan adamdardyń barlyǵyna ýájip. Jaqsylap ǵusyl quıynǵannan (deneni tolyqtaı jýý) keıin ádemi, taza kıimderin kıip, ústine hosh ıis seýip, meshitke aıt namazyna barý – mustahab(jaqsy amaldarǵa jatady).

Sýretterdi «FOTOGALEREIa» aıdarynan kóre alasyzdar!