ASTANA QALASY JASTAR ISI SEKTORY QARAǴANDYDAǴY EŃBEKPEN TÚZEÝ LAGERINE BARDY (FOTO) 

Astana qalasy ókildigi «Abu Nasyr Al-Farabi» meshitiniń Jastar isi sektoryna jaýapty mamany Amanjolov Altynbek bastaǵan belsendi jastar 31 mamyr – Saıası qýǵyn-súrgin jáne Asharshylyq qurbandaryn eske alý kúnine oraı Qaraǵandy oblysynda ornalasqan KarLAG lagerine baryp, jazyqsyz qurban bolǵan babalardy eske aldy. 

Sapar barysynda jastar Dolınka aýylyndaǵy tarıhı-mádenı mýzeı keshenin aralap, stalındik repressııa jyldary jazyqsyz japa shekken bozdaqtardyń ómirimen tanysty. Sondaı-aq, olardyń rýhyna Quran baǵyshtap, duǵa jasady.

Jastar bul shara arqyly tarıhtan taǵylym alyp, eliniń keshegisin umytpaý qajettigin tereń sezingenderin jetkizdi. Mundaı taǵylymdy sharalar jastardyń otansúıgishtik rýhyn kóterip, ótkenge qurmetpen qaraýyna sep bolatynyn atap ótti.

KarLAG (Qaraǵandy eńbekpen túzeý lageri) — KSRO-daǵy GÝLAG júıesine qarasty eń iri lagerlerdiń biri. Ol 1931 jyly qurylyp, 1959 jylǵa deıin jumys istedi. Lager aýmaǵy Qaraǵandy oblysynyń keń baıtaq óńirin qamtydy. Munda jazyqsyz aıyptalǵan júzdegen myń adam aýyr eńbekke jegildi. Tutqyndar ken óndirisimen, aýyl sharýashylyǵymen, qurylys jumystarymen aınalysty. KarLAG – Keńes dáýirindegi saıası qýǵyn-súrginniń qasiretti sımvolyna aınaldy.