Zulhıjja aıynyń 1-kúni: Uıqyny qurban etý, tahajýd namazy
Zúlhıjja aıynyń alǵashqy on túninde táhájjúd – uıqyny qurban etý
Zúlhıjja aıy kelgen kezde júrekterge nur sebilip, aspan qaqpalary ashylyp, saýap eselenetin erekshe maýsym bastalady. Allanyń Elshisi (Allanyń oǵan ıgili men sálemi bolsyn) bul kúnder týraly bylaı degen:
«Alla Taǵala úshin bul on kúndegi izgi amaldardan artyq súıikti amal joq»
(Býharı jetkizgen)
Osy kúnderi ǵıbadattyń kóptegen túrleri bar. Alaıda eń tereń, eń jasyryn ári shynaıy túrde jasalatyny – táhájjúd, ıaǵnı túngi namaz.
Táhájjúd – tańdaýlylardyń ǵıbadaty
Táhájjúd – ózgeshe qulshylyq. Ol – adam men Rabby arasyndaǵy jasyryn syrlasý sáti. Uıqynyń rahatyn tastap, kórpesin serpip, eshkim kórmeıtin sátte tize búgip, Quran oqyp, duǵa etip, sájde jasaıtyndardyń amalynan.
Mine, osyndaı túngi turý – «uıqyny Alla jolynda qurban etý». Bul shynaıy súıispenshilik pen taqýalyqtyń belgisi.
Alla Taǵala bylaı deıdi:
«Olardyń qyr arqalary tósekterinen ajyraıdy. Olar Rabbylaryna qorqynysh jáne úmitpen duǵa etedi»
(Sájde súresi, 16-aıat)
Bul túnderdi bos ótkizbe
Zúlhıjja aıynyń alǵashqy on túninde túngi namaz oqý – erekshe saýapty is. Sebebi bul kúnderde saýap eselep jazylady, kúnálar keshiriledi, júrek tazarady.
Sahabalardyń ózi bul on kúnge erekshe daıyndalatyn. Abdýlla ıbn Omar, Ibn Abbas syndy sahabalar túnderin túgeldeı ǵıbadatpen ótkizetin.
Paıǵambarymyz(Allanyń oǵan ıgili men sálemi bolsyn) aıtqan:
«Paryz namazynan keıingi eń abzal namaz – túngi namaz»
(Mýslım jetkizgen)
Táhájjúd – shynaıylardyń minájaty
Tún tynyshtyǵynda aıtylǵan árbir duǵa, tógilgen árbir jas – Allanyń nazarynda. Sol sátte adam Rabbysyna eń jaqyn bolady.
Ol kezde dúnıe baılyǵy men dańq emes, júrektegi yqylas pen moıynsuný baǵalanady.
Sol úshin bul túnderdi jasyryn qurbandyqtyń ýaqyty deýge bolady:
«Uıqyńdy qurban et, óz nápsińdi tyı, Rabbyńa bet bur»
Táhájjúdtiń jemisteri:
- Kúnálardyń keshirilýi
- Jan tynyshtyǵy men júrek tazalyǵy
- Jalǵyzdyqta Rabbymen syrlasý
- Arafa kúni men Qurban aıtqa rýhanı daıyndyq
Eger túnde turyp namaz oqýǵa, duǵa etýge múmkindik bolsa – ony paıdalan. Ol – taqýalardyń joly, shynaıy súıgenderdiń minezi.
Alla Taǵala olarǵa qatysty:
«Olar túnniń az ǵana bóliginde ǵana uıyqtaıtyn edi»
(Zarııat súresi, 17-aıat) – dep sıpattaǵan.
Zúlhıjjanyń on túninde túngi namazdy jasyryn qurbandyǵyń et. Tún tynyshtyǵynda Rabbyńa bet buryp, shyn júrekten minájat et.
Paıǵambarymyz(Allanyń oǵan ıgili men sálemi bolsyn) aıtqan:
«Rabby Taǵala ár túnniń sońǵy úshten bir bóliginde jerge túsedi de: “Duǵa etýshi bar ma – tilegin qabyl etemin; jarylqaý tilegen bar ma – kúnásin keshiremin” – dep daýystaıdy»
(Mýslım jetkizgen)
Bir túndik táhájjúd – seni Rabbyńa jaqyndatady, al júrekke nur syılaıdy. Buryńǵy ómirińdi ózgertkiń kelse, osy qasıetti túnderde Alla úshin uıqyńdy qurban et! Allanyń saǵan razylyǵy túsken kezde, ómirińniń ózgergenin baıqasyń!
Ersaıyn Sákenov, «Áziret Sultan» meshitiniń ustazy, Ál-Ázhar ýnıversıtetiniń túlegi
