JÚNIS ÁMIRE (1238 – 1328)
Essiz júrek, bulqynasyń, daýyl qýǵan tolqyndaı,
Basylsańshy, janarymdy qandy jasqa toltyrmaı.
Súıiktimnen jyraq qaldym, jetpeı qolym sozǵanmen,
Áýezdi únin estı almaı, zarmyn, qulaq tosqanmen.
Dármensizbin, súıiktim joq, aıaq-qoldan ál ketti,
Emi de joq bul dertimniń, usynbańdar dármekti.
Júregimniń jaraqaty jazylardaı bolmady,
Kózdiń jasy kóldeı bolyp, qýys keýil tolmady.
Men jolyńda qurbanyńmyn, kórmeımisiń túrimdi,
Tabanyńmen talqandap ót, qaldyrmaı-aq túgimdi.
Qaraqshydaı taý men jartas jolymdy kep torıdy
Súıiktime ótkel bermeı, menen nege qorıdy?
Sol jartastyń tóbesinen buıra bulttar júzer me,
Mendeı bolyp, súıiktim de kózdiń jasyn úzer me?
Miskin Júnis, ot júregiń túsip qaldy tuzaqqa,
Óz otanyń qaldy jyraq, bet aldyń tym uzaqqa...
***
Aıdaı júziń jaınatty da baǵymdy,
Bulbul saırap, kúı bulaqtaı aǵyldy.
Ózińe yntyq bolǵan júrek mas bolyp
Búlik bastap, tutandy da, jaǵyldy.
Júregimniń tappaı eshbir daýasyn,
Táýip bardym, ushyqta dep jarasyn.
Ol tamyryn basty-daǵy qolymnyń
Dedi: – Eı, miskin, sen sharasyz balasyń.
Seniń dertiń daýasyz dert, emi joq,
Dári izdeme, bir-aq amal tabasyń:
Amaly sol – kúl bolǵansha osylaı
Lapyldaısyń, bastan-aıaq janasyń.
Miskin, Júnis, bul erkińnen tysqary,
Bilmeýshi me eń bul belgili nusqany:
Qul bolý tek – ǵashyqtardyń jospary
Kúl bolý tek – kóbelektiń ushqany.
***
Mahabbattyń teńizine súńgımin,
Tereńine batyp únsiz múlgımin.
Ketemin solaı.
Eki álemniń ortasynda janamyn,
Ýaqyttan tys keńistikpen aǵamyn.
Ketemin solaı.
Álıf te emes, dal da emespin, mım de emen,
Batqan saıyn jeńem jaýdy «men» degen,
Ketemin solaı.
Jan Dosymnyń baý-sharbaǵyn jaılaımyn,
Baqshasynda bulbul qus bop saıraımyn.
Ketemin solaı.
Júrek bolyp, tán túnegin jaǵamyn,
Saǵan qaraı bastaıtyn jol tabamyn.
Ketemin solaı.
Sorly ǵashyq – Májnún Júnis, Sal Júnis,
Ǵashyǵyńa jetem deseń, sál tyrys.
Ketemin solaı.
Tán shıpasy, jannyń emi – Jar demi,
Erik bermeı, tutqynyńa al meni,
Ketemin solaı.
***
Sen dárýish bola almaısyń!
Dárýishter aıtty maǵan,
«Bola almaısyń sen dárýish».
Munan basqa aıtarym joq:
Sen dárýish bola almaısyń!
Dárýishtiń keýdesinde
Soǵar júrek párshalanǵan,
Dárýish sol – kúndiz-túni
Kózderinen tamsa marjan.
Al janynyń jumsaqtyǵy
Sezgen janǵa – ańsar arman.
Mineziniń kórkemdigin
Bilersiń tek baqsań baǵlan.
Sen dárýish bola almaısyń!
Ursań kez bop dárýishti
Tura berer qolsyz jandaı,
Tildep kórseń dárýishti
Qalar únsiz, tilsiz jandaı.
Sen dárýish bola almaısyń!
Qanshama sóz aıttyń doly,
Shashasyń kep tildiń zárin.
Ashý-yza boıyń toly
Ǵaıbattaısyń eldiń bárin,
Sen dárýish bola almaısyń!
Ashýǵa erik berer bolsa
Muhammedte joq pa edi ol?
Kektenbedi, kektengenniń
Nurmen shaıdy ot demin Ol.
Ashýyńdy meńgermeseń
Sen dárýish bola almaısyń!
Óz oıyńdy baqpaıynsha
Kámil Ustaz tappaıynsha
Aqıqattyń tereńinen
Bir tamshy bal tatpaıynsha
Sen dárýish bola almaısyń!
Sondyqtan da Júnis miskin,
Muhıt kórseń, jyldam túskin
Bat tereńge, jannan keshkin
Qorqyta almas sonda eshkim.
Munyń bárin jasamasań
Sen dárýish bola almaısyń!
Qalyptaǵan Láıli QUNDAQBAI
