JETES BIDIŃ JAÝABY

Jetes bı 80 jasqa shyqqanda Tórtqara Taýshanuly Jaǵal sálem bere kelip:

—"80—jasty qalaı ótkizińiz, Jetes aǵa? "—dep surapty deıdi.

Sonda Jetes bı bylaı jaýap bergen eken:

«Onnan jasym ótkenshe, balalyqpen oınadym, qyzyǵyna toımadym, quraqtaı ósip kún sanap birte birte boıladym.

Jıyrma jasqa jetken soń paıdasyn bastyń oıladym.

Túndi oıynmen ótkizip, kúndiz toıdy toıladym.

Sádirmek jeli sabyltyp qyz —qyrqyndy qoımadym.

Otyzdan jasym asqanda, dostyń kóńilin qaldyrmadym, jatqa syrdy aldyrmadym, eki talaı jerlerde órtke shalǵaıdy shaldyrmadym.

Qyryqqa jasym jetkende, nazbedeýdeı qarqyndadym, aq semserdeı jarqyldadym, bulaqtaı qaınap sarqyldadym, esh nárseden qorǵanyp tartynbadym.

Elý jasqa kelgende, bir bıik shyńnyń basyna shyqtym, damyl alyp tizemdi búktim, jan jaǵymdy ólshestirip, aldy artyma kózimdi tiktim.

Alpys jasqa kelgende altynshy taraý jol kez boldy, úshinshi dúrkin el kez boldy, bes taraý jol, eki dúrkin el esime túsip basyma ábden shar kez boldy.

Jetpisten jasym asqan soń, shamamdy baıqap kórdim, tartynbaı jetekke erdim, bılikti bala —shaǵalarǵa berdim, aıtqandaryna kóndim.

Seksenge aıaq basqan soń jurttan aýlaq ketip turmyn, jol shetine jetip turmyn, segiz belden asyp turmyn, etek jeńimdi jınastyryp tek táýekel etip turmyn.

Aldym endi toqsan men júz, jan —jaǵym taıǵaq kókshe muz.

Ótken dáýiriń qaıtyp kelmes dep tur maǵan, kúderińdi úz!..»

Túsingen adamǵa Jetes bıdiń osy jaýap sózderi tirkesinde ǵıbrat alarlyq kóp mán —maǵyna jatqan joq pa?!