ShIRKTIŃ MÁNI
Adamnyń ishindegi eń úlken put — nápsi.
Al syrttaǵy puttar — sonyń kóleńkesi ǵana.
Biz syrttaǵy putty syndyrýmen aınalysamyz. Qoldan jasalǵan músinderdi, jalǵan táńirlerdi, syrtqy tabynýlardy joqqa shyǵaramyz. Biraq sonyń bárin istep júrip, ishki put — nápsimizdi táńirge aınaldyryp alǵanymyzdy baıqamaımyz.
Bul — shırktyń eń jasyryn, eń zulmat túri.
Adam "Men Qudaı úshin istedim" deıdi, biraq ishki daýysy: "Men úshin istedim" dep sybyrlaıdy.
Syrttaı sájdede, ishteı ózin madaqtap turady.
Put degen – qolmen ustaǵan zat qana emes.
Put – oı.
Put – ózińdi ózgeden bıik sanaý.
Put – menmin deý.
Put – óz aqylyńdy aqıqattyń ornyna qoıý.
Bireý dúnıege tabynady – ol anyq put.
Biraq bireý óz taqýalyǵyna tabynady – bul odan da jaman put.
Sebebi alǵashqysy ózin putqa qul etedi. Al sońǵysy ózin qudaı kóredi.
Shırk degen – serik qosý.
Biraq bul serikti músin dep uǵý – tym ústirt túsinik.
Shyn serik – adamnyń ózi.
Keıde adam Jaratýshyǵa emes, óz minezine, óz pikirine, óz lázzatyna, óz ustanymyna tabynady.
Sonda Qudaı emes, nápsi ámir beredi.
“Meniń pikirim”,
«Meniń jolym»,
«Meniń aqıqatym» degen sózder – ishki puttyń aıǵaıy.
Shırktiń eń aýyr túri – ózin bilmeı turyp Qudaı týraly aıtý.
Ishki nápsi put retinde ornynda turǵanda, adam ne aıtsa da, ol nápsi daýysy ǵana.
Ol – Allanyń atymen nápsisin aqtaý.
TÁÝBE – PUT SYNDYRÝ EMES, NÁPSINI TASTAÝ
Shırkten qutylý úshin músindi syndyrý az.
Ony jasaǵan qoldy, qalaǵan kóńildi ózgertý kerek.
Bul – ıhsan joly.
Bul – Allany kórip turǵandaı ómir súrý joly.
Janyndaǵy emes, janyńdaǵy putty syndyr.
Sebebi ol seni Alladan alshaqtatyp tur.
