ShEGIŃDI BIL…
Bala kúnimnen beri ishimde bir mazasyz kúı bar edi: bári óz ornymen, tynysh, retimen bolsa eken deımin. Anam uıyqtap jatsa, baýyrlarym sybdyr shyǵarmaı, tynysh otyrsa eken dep tileıtinmin. Biraq olardy tyıyp tastaý meniń qolymnan kelmeıtin. Sonda ishteı býlyǵyp, ózimshe kúızelip qalatynmyn. Men úlkeni de emes, jón silter aqsaqaly da emes edim ǵoı.
Eseıe kele sol sezim menimen birge erdi. Meshitke barsam da, ózimdi jaýaptydaı sezinemin. Imam emespin, jasy úlken de emespin, biraq bári tártippen, jarasymmen ótse eken deımin. Balalar shýlasa, bireý orynsyz qylyq jasasa, eki adam sózge kelip qalsa — júregim shym ete túsedi, ózim kinálideı kúı keshemin.
Jurt jınalǵan jerde de solaı: qonaqasy basqa bireýdiki bolsa da, bári sátti ótse eken deımin. Bireý artyq sóılep, bireýdi qaǵytsa ne uıaltyp alsa, ishim ýdaı ashıdy.
Jas ulǵaıǵan saıyn bul kúı tereńdeı tústi. Ata-anam, baýyrlarym aman-esen, baqýatty bolsa eken dep tileımin. Biraq bir qıyndyq týa qalsa, oıym san-saqqa júgirip, bárin ózim túzegim keledi. Bolmaıtyndy da bolady dep, bárin minsiz etkim keledi.
Keıin óz aldyma shańyraq kóterdim, bala-shaǵa súıdim. Biraq baıaǵy kúı taǵy da qyr sońymnan qalmady. Balalarymnyń mektebi, ortasy, ýaıymy — bári meniń janymdy jegideı jeıdi. Ózim san tarapqa bólinip ketkendeımin.
Sonda bir kúni oıǵa qaldym: bul jaı ǵana artyq meıirim ne sezimniń álsizdigi emes eken. Bul — Allaǵa degen ádepti attaý, pendeniń ózine tıesili emes iske kıligýi eken. Álsiz quldyń óz ornyn umytyp, shamasynan tysqa umtylýy eken.
Óıtkeni men ýaıymdap júrgen jandardyń taǵdyry meniń qolymda emes. Olardyń nesibesi de, ómir joly da maǵan tapsyrylmaǵan.
Iá, qolymnan kelgeni — duǵa etý, aqyl aıtý, qoldan kelgenshe járdem berý. Biraq bárin baqylaýda ustaımyn deý, bárin ózim retteımin deý, «men bolmasam, bári shaıqalady» dep oılaý — bos qııal, quldyq ádebinen alystaý.
Bul dúnıedegi ár jannyń Iesi — bir Alla.
Basqarýshy da — Sol, bılik te — Sonyń quzyrynda.
Sen eshkimge ýákil de, kúzetshi de emessiń.
Seniń qolyńda eshteńe joq — tipti qyldaı da salmaq joq.
Táýekel — naǵyz quldyqtyń belgisi.
Rabbyńdy taný, ózińniń pende ekenińdi uǵyný.
Barlyq is — Rabbyńnyń qalaýynda, quzyrynda.
«(Jaqyp paıǵambar) aıtty: “Ýa, uldarym! Bir qaqpadan kirmeńder, árqaısyń ártúrli qaqpadan kirińder. Biraq men senderdi Allanyń jazǵanynan esh qorǵaı almaımyn. Úkim tek Allaǵa tán. Men Oǵan táýekel ettim. Endeshe, táýekel etýshiler de tek Oǵan táýekel etsin.”»
