RÝMIDEN

SYBYZǴYNYŃ SYRY

Sybyzǵynyń estımisiz muńly únin, –

Saǵynyshtan zar ıleıdi bulbul ún.

Neni ańsaıdy, ne deıdi áýen syńsyǵan?

– O bastaǵy negizime qulshynam.

(Tegim meniń qamys edi, dińimnen

Kesilgen soń óksik shyqty únimnen).

Sodan ba eken, kómeıimnen án kúmis

Tógilgende, siz de jylap qaldyńyz.

Ajyraǵan tamyrynan qunardyń

Jan barmysyń?

Men – sol janǵa syńarmyn.

Taǵdyrlaspyn taǵdyrymen aqty kún,

Baǵy taıǵan bir kezdergi baqtynyń.

Sodan bolar, áýes meniń ánime

Qaıǵyly men muńly jannyń bári de.

Eshkim tolyq uǵyna almas muńymdy,

Jat uǵar ma ózim de uqpas syrymdy?

Janym tánnen tym alysta, bólek tur,

Eki arany perde-tuman bólep tur.

Meniń únim – jeldeı emes jelpigen,

Ottaı ystyq, tyńdasań jan eltigen.

Kimniń dosy bolsa ózinen alys tym,

Dospyn soǵan: men – syńsyǵan qamyspyn.

Táńrisinen ketse úzilip iz burys,

Syrly áýenmen jaqyndatý – bizdiń is.

Rýhy álsizder ustap meni, úrlese –

Ý-záharmyn, bilip júrsin bilmese.

Haq jolynan taımaı soqqan júrektiń

Dúrsiline súıenishpin, tirekpin.

Men jylaımyn sen keshpe dep zaıǵyny:

Májnún bolyp súıse eken dep Láılini.

Qansha tyrys, syımaıdy syr aqylǵa,

Júrek qana áýendi uǵar, maqulda?

Saǵynyshpen ystalmasa bal-yshqyń,

Uǵar ma ediń shyryndy únin qamystyń?

Al búginde saz úrlegen deminiń

Sybyzǵymyn emi – qaıǵy, deni – muń.

Ketken baqtyń kóz aıyrmaı jolynan,

Razylyqpen qol bulǵaımyn sońynan.

Balyq sýdan basy shyqsa, dem – saýǵa,

Biz de – bir ań as toltyrǵan jemsaýǵa.

Izdegen jan tek nápsiniń zaryǵyn,

Qylar umyt dúnıeniń jaryǵyn.

Oılaýmenen as-aýqatyn tániniń

Umytady qajetti asyn janynyń.

Óz negizin tanymaǵan – tiri emes,

Tanyǵan men tanymaǵan – bir emes.

Erkindikke umtyl, úz de arqandy

Altyn jipten esilse de, talqan qyl.

Sen de endi qyl qanaǵat uıal da,

Qumyraǵa ózen sýy sııar ma?

Toıymsyzdyń ash kózderin jutynǵan

Toltyrýǵa tyrysqan jan utylǵan.

Dúnıege qyzyqpaıtyn basy artyq

Dıdar talap jannyń ǵana bási artyq.

Arsyzdyqtyń lyqsyp tolsa naýasy

Tek Mahabbat – ol keseldiń daýasy.

Ondaı qylyp emdeı almas uqqanǵa

Tipti alyp Aplaton da, Luqpan da.

Onyń demi jerbetindik deneni

Kókke ushyryp, Jarǵa jalǵap beredi.

Sol Mahabbat qaǵıdasy jattaǵan –

Musany da Pirǵaýynnan saqtaǵan.

Ol kelgende til bulbuldaı saıraıdy,

Taǵy da Ózi tildi kelip baılaıdy.

Óz tilińe jalǵa dostyń qulaǵyn –

Taza áýenniń aǵyzarsyń bulaǵyn.

Áziz dosyń ketse ajyrap máńgige

Án de úziler, úziledi áńgime.

Baq ishinde joqtyǵynan bir gúldiń,

Úni shyqpas sesi sulý bulbuldyń.

Ózi kúl bop ketse de úzbeı táýbesin,

Tóger ǵashyq súıgeniniń sáýlesin.

Sol sáýleden nur ilmeseń taǵatsyz,

Usha almassyń, sen de – bir qus qanatsyz.

Aınala, mań túnek bolsa, qarańǵy,

Kórip, boljap, bile almassyń shamańdy.

Mahabbatqa tolyp turǵan baq shirep,

Aqıqattyń aınasy sol – aq júrek.

Sol aınadan kóre almasań júzińdi

Onda asyq tazartýǵa ishińdi.

Sybyzǵynyń ánine eltip júregiń

Rýhyń túlep, buzsyn tánniń túnegin.

 

***

Qudaı maǵan syryn ashty, ún qatyp –

Shabyttanyp, jasyn ottaı jarq ettim.

Únsiz qaldy, tynyshtyqty tyńdatyp,

Joq boldym da, dúnıeni tárk ettim.

Al eskertý jasap edi, sorlatyp,

Úreı, syrqat jeńip boıdy, jalp ettim.

Sosyn qymbat syı jasady: jyrlatyp

Kóldeı qylyp kóz jasymdy sarp ettim.

 

***

Men – sol qulmyn óz Sultany quldyq uryp, jol bergen,

Sol múrıdpin, óz Ustazy ulyq tutyp, qol bergen!

Men – sol Rýhpyn keshe ǵana kelgen jaryq álemge

Sóıtse-daǵy Álmısaqta ýaǵda bergen Jálelge.

Men – balaýyz balqymamyn, janǵan otta qaqtalǵan,

Sóıte tura bolatpyn men, berik qynda saqtalǵan.

Sýret salyp, súrme jaqtym kórmeıtuǵyn kózderge,

Kórinbesti kórneki ettim, jan bitirip sóz-demge.

Qara bultpyn kóktiń júzin qara túndeı qaptaǵan

Sóıte tura baýyryna jaryq nuryn saqtaǵan.

Qara jermin jalyndy oty ǵarshy júzin sharpyǵan

Sol otynan aspan balqyp, aı men juldyz shalqyǵan.

Keshe túnde Sultanym da qýanyshtan sharq urdy,

Sebebi: Ony Mendeı quly esine aldy zar-muńly.

Jáne munyń sóketi joq, sebebi – Ózi mas qylǵan,

Sol nadanmyn – talaby zor jaralsam da las qumnan.

Kenet... janym tynym tapty, ilinip qap kúrmeýge,

Aına júzin úrlep qaldym, óz júzimdi kórmeýge.

Máıhanańnan sharap iship kún-túni

Kúl-tánimdi tastap shyǵam bir kúni.

El tańǵalar kórip mendik tózimdi

Máıhanadan tapqanyma Ózińdi.

Kedeı de men, baı da menmin, al endi,

Eshbir sózim kerek etpes dáleldi.

Kóńildi de, muńly da men, ózi mas,

Bilesiń ǵoı, ózi mastyń – sózi ras.

Máıhanańda azap shektim búrseńdep,

Sharap úshin, sosyn...

sosyn Bir Sen dep.

 

Qalyptaǵan Láıli QUNDAQBAI