QUDAIDY KÓRGIŃ KELSE...
Es bilgennen úlkender jaǵy Qudaıdy qulaǵymyzǵa ábden quıyp tastaǵan. Ár iste Qudaıǵa táýekel jasaýdy aıtyp, asyp ketsek táýbege keltirip, jasyp qalsaq, jaqsy amaldar arqyly jubatqan. Din men dástúrdi qatar ustap, sol arqyly tárbıege shaqyryp, durys jolǵa salyp otyratyn. Eshbir dinde adamgershilikten atta, ardy sat, adam óltir demeıdi. Uryp-soǵý, zorlyq zombylyq jasaý bylaı tursyn, kip-kishkentaı jándikke de zııan keltirý — kúná. Biz osylaısha qudaıdy jaqsy kórdik. Kúná jasaýǵa Qudaıdan qoryqtyq. Tirshilik ataýlyny Qudaısyz elestete de almadyq.
Birde atammen Qudaı týraly áńgime qyldym. Ol meniń túsinigimde kópti kórgen, kónekóz qarııa. Dáretsiz júrmeıdi, namazyn qaza qylmaıdy. Biraq, ásiredinshiligi joq. Qarapaıym ǵana kún keshetin, baryna qanaǵat etken jan. Onyń aýzynan Qudaıy túspegen. Ekeýimiz dastarhan jaǵalaı otyrmyz. Ol tórde, men tómende. Men atama qarap:
— Ataý, Qudaıdy kórgim keledi, ony tek o dúnıede ǵana kóremin be? — degen saýaldy kóldeneń tarttym. Atam tosylyp qalǵan joq. Mańdaıdan parlaı aqqan terdi appaq betoramalymen súrtip tastady da, shaıyn bappen iship otyryp bylaı dedi:
— Qyzym, Qudaıdy kórgiń kelgeni qandaı jaqsy?! Eń aldymen onyń bar ekenine sený — durys amal. Al, onyń júzin kórgiń kelse aıtaıyn, tyńda, qaraǵym. — dep bir qozǵalyp baryp, sózin jalǵastyrdy.
— Baıaǵyda bir adam bolypty. Ol da óziń tárizdi Allany kórýdi qalapty. Biraq, esh jerden tappapty. Tipti, birde joly bolmaı, qaýqarsyz qalǵan kezde «Osy Alla degen joq shyǵar, bar bolsa nege maǵan kómektespeıdi, men ony esh jerden kórmedim ǵoı» dep kúńirenipti. Birde aýyl shetindegi aǵysy qatty ózenge aıaǵy taıyp qulap ketedi. Sýǵa shógip bara jatqan jerinde bir adam ǵaıyptan kelip qutqarady. Ajal aýzynan osylaısha aman qalady. Sol kúni tún mezgili erterek qamdanyp, tósekke jatady. Kózi ilinip ketkende Qudaıdan Jebireıil perishte arqyly ýaqı kelipti.
— Sen Qudaıdy kórgiń keldi. Biraq, óziń Qudaıdan alystap kettiń. Ótkende kórshińniń úıi qulap, sennen pana surap kelgende, sen ony úıińe qondyrmadyń. Ol qatty qınaldy. Men saǵan sol adamnyń beınesinde kelip edim. Qolymdy qaıtardyń. Taǵy birde jaqyn adamyń tósek tartyp, qatty aýyryp jatyp qaldy. Sen ony kórýge bir ret te barmadyń. Men sol aýrý adamnyń júzindegi muń edim. Kelseń kórýshi ediń. Jaqyn arada bir jetim bala sennen qaıyr-sadaqa surady. Sen onyń qolyna az ǵana tıyn-teben ustata saldyń. Sol muqtaj balanyń kózindegi úmit men edim. Sol kezde jasaǵan kishkentaı sadaqań ózińe úlken jaqsylyq bolyp oraldy. Ajaldan aman qalǵanyń qaıyrymyńnyń arqasy — depti. Ol uıqydan oıana salyp, táýbege kelipti. Júrgen jerinde osy támsildi tastamaı, adamdardy jaqsylyq jasaýǵa, izgilik dánegin kóbeıtýge shaqyrypty. Sol adam óle ólgenshe tapqan taıanǵanyn jetim-jesirlerge, kárip-kásirlerge, muqtajdarǵa taratyp, atymtaı jomartqa aınalypty. Qyzym, Qudaı ár kez qasyńda. Ony kórgiń kelse muqtajǵa bar, aýrýdyń halin sura, jetimniń basyn sıpap, jesirge qolyńnan kelse qaras. Úmitsizge úmit syıla, aqshań az bolsa, tym bolmasa jaqsy sóz aıt, bul amaldar seni Qudaıǵa jaqyndata túsedi, qarǵam, — dedi. Bul támsil maǵan rasynda oı saldy.
Sulýhan MYŃBAI
