ÓZIN ALMADYQ, SÓZIN ALDYQ...

Belgili kanadalyq-amerıkalyq kıno juldyzy Kıaný Rıvz óziniń Feısbýk paraqshasynda adamdarǵa ómirge qandaı qatynas qurý jaıynda keńes berdi. Onyń bul postyn 250 000-ǵa jýyq adam unatyp, taratqan.

Kıanýdiń keı pikirleri rasynda ómirdiń mánin uǵynýǵa bir qadam jaqyndatardaı. Oqyp kórińiz, baǵasyn berińiz. Biz avtordyń ózin emes, onyń sózin ǵana úlgige aldyq. Sonymen, K.Rıvz bylaı deıdi:

«Sizder meniń artymdaǵy adamdardy kórip tursyzdar ma? Olar jumysqa asyǵýda jáne eshnársege mán bermeıdi. Biz keı kezderi kúndelikti kúıbeń tirshiliktiń shyrmaýyna kirip, arasynda úzilis jasaýdy jáne ómirdiń ǵajap kórinisinen lázzat alýdy umyt qaldyramyz. Beıne bir zombı sekildimiz.

Kózińizdi ashyńyz. Qulaqtaryńyzdaǵyny (qulaqqap) alyńyz.

Qarsy aldyńyzdan shyqqan adamǵa «Sálem» berińiz, kóńilsiz bireý bolsa, ony qushaqtańyz (1). Qolyńyzdan kelgeninshe kómektesińiz (2).

Sizder árbir kúnderińizdi sońǵy ýaqytyńyzdaı ómir súrińizder (3).

Adamdar osydan eki jyl buryn meniń sumdyq kúızeliske ushyraǵanymdy bilmeıdi. Men eshqashan ol jaıynda aıtpadym. Men ózim jeńip shyǵýǵa jáne sol kúızelisten shyǵar joldy tabýǵa mindetti edim. Meniń baqytty bolýyma sebepker adam, ol – ÓZIM ǵana (4).

Árbir kún – baǵaly. Sol sebepti, sol kúnge durys kóńil bóleıik.

Eshkim dál erteń ne bolaryna kepildik bere almaıdy. Búginińdi baǵala!» (3)

Al kúlli álem musylmandary qurmet tutatyn qasıetti Quran aıattary men paıǵambar ósıetterinde bylaı delinedi:

1) Aıat: «Eger sizderge bireý amandassa, sálemin odan da asyra ne dál solaı qabyl alyńyzdar!» («Nısa» súresi, 86-aıat).

 Hadıs: «Rasynda, adamdardyń ishinde Alla Taǵalaǵa eń jaqyny – basqalarǵa birinshi bolyp sálemdeskeni», «Islam buıyrǵan qaıyrly is – tanıtynǵa da, tanymaıtynǵa da sálem berý. Aralaryńda sálemdi taratyńdar».

 2) Aıat: «Sender jaqsy kórgen nárselerińnen jumsamaıynsha, ıgilikke jete almaısyńdar. Ári sender ne jumsasańdar da, Alla – ony Bilýshi» («Álı Ǵımran» súresi, 92-aıat).

Hadıs: «Jasyryn ne ashyq túrde kóp sadaqa berińder, rızyqtaryń kóbeıedi, kómekke ashyq bolyńdar, duǵalaryń qabyl bolady.»

3) Aıat: «Eshbir jan erteń ne isteıtinin bilmeıdi, eshbir jan qashan óletinin bilmeıdi» («Luqman» súresi, 34-aıat.)

Hadıs: «Eki nyǵmet bar, adamdardyń kóbi onyń qadirin bilmeıdi. Ol – densaýlyq pen bos ýaqyt».

4) Aıat: «Árıne, sabyr etkenderge istegen isterinen de jaqsy syı beremiz» («Nahl» súresi, 96-aıat).

Hadıs: «Kimde-kim sabyrly bolýǵa tyryssa, Allah oǵan sabyr beredi. Adam balasyna sabyrdan artyq qaıyrly ári úlken syılyq berilmegen».

Qyzyq derek

Kıaný Rıvz qanshalyqty tanymal tulǵa bolǵanymen, akterdi qala kóshelerinde jabyrqaý kúıde, jalǵyzdyqty serik etip ketip bara jatqanyn kóre alasyz. Onyń qala baǵyndaǵy shetkeri lashyqta ońasha oıǵa batqan sátterin, beton bordıýrde kofe iship nemese metroda gazet oqyp otyrǵanyn kópshilik jıi baıqaıdy. Tipten, ǵalamtor betinde Rıvzdyń kóńilsiz kúıi beınelengen fotomen 2010 jyly «Kóńilsiz Kıaný» atty ınternet-mem paıda boldy. Al Facebook jelisindegi akterdiń jankúıerleri 15 maýsymdy «Kıaný Rıvzdyń kóńilin kóterýge arnalǵan beıresmı kún» etip belgilep alǵan.

Kıaný Rıvz óziniń ataýly mereıtoılaryn da eleýsiz ótkizip jiberedi. Gollıvýd juldyzy 50 jyldyq mereıtoı keshin óz shańyraǵynda, otbasymen jáne ápkesimen ǵana atap ótken.

Jaıyq NAǴYMASh