Namazym qaza boldy (1-bólim)

Birneshe jyl boıy seksenge taıaǵan bir qart qarııany baqylap júrdim. Azanǵa birneshe mınýt qalǵanda kóshege kóz salsam boldy — qolyndaǵy taıaǵyna súıenip, meshitke qaraı asyqqan sol kisini mindetti túrde kóretinmin.

Júzinen árdaıym bir sabyrly, jyly jymıys ketpeıtin. Sol sátterde meniń ishimnen uıalǵan kúıde túrli suraqtar týa bastaıtyn. Biraq olardy áp-sátte ózim-aq «jaqsy» syltaýlarmen jýyp-shaıyp tastaıtynmyn. Sóıtip, suraqtar da, uıat ta izim-qaıym joǵalyp ketetin.

Keıde qaıta qarap qoıamyn — álgi qarııa namazdan qaıtyp, úıine qaraı bet alyp bara jatady. Jolaı kórshilerine amandasyp ótedi. Men saǵatyma qarap, tań qalamyn. Namaz bitip qalypty. Sol sátte esime meshitke barmaýǵa sebep etken oıym túsedi: «Istep jatqan sharýań bar ǵoı, bitir de, keıin oqı sal» — dep ózimdi jubatqanmyn. Sol kezde ishimnen suraı bastaımyn: «Rasynda, sol sátte sondaı mańyzdy birdeńe istep jatyr ma edim? Boldy delik, biraq ne bolar edi, bes-on mınýtqa bólip, namazymdy oqyp alsam?!» Ádettegideı, ishki daýystar kelip, túrli «negizdi» sebepter men «dáleldi» jaýaptar aıtatyn shyǵar dep kútem. Biraq bul joly olar kelmeıdi. Sebebi olar tek namaz ýaqyty bastalmaı turyp keletin. Ýaqyt ótip ketken soń – bári joq. Men bolsam, syrttaı tynysh kóringenimmen, ishteı únsiz arpalysqa túsip otyramyn.

Namazym qaza boldy

Qanshama ret meni oıatqan – tań namazyna azan shaqyrýǵa bara jatqan sypaıy, kóńildi qarııanyń taıaǵynyń syqyry edi. Al men sol kezde meshitte ár namazǵa azan shaqyratyn ımam bar ekenin biletinmin. Biraq tań namazynyń azanyn álgi qarııaǵa arnaıy qaldyratynyn bilmeppin. Birneshe jyl boıy sol taıaqtyń syqyryn estip júrdim — aıaz da, jańbyr da ony toqtata almady. Jyldar ótti, zaman ózgerdi. Biraq álgi taıaq áli kúnge deıin meni oıatady. Ár joly oıatqanda meniń oıyma bir top "jóndi" syltaýlar daıyn turatyn. Sóıtip men qaıtadan uıqyǵa batyp, óz syltaýyma ishteı kelisip jatamyn.

Óz-ózimdi bylaı jubattym: «Bul kisi túndi uıqysyz ótkizip, tańǵa deıin otyrsa kerek. Óıtkeni óz kásibi bar, tańerteń turý oǵan mindet emes. Sondyqtan ol úshin tań namazyna turý ońaı». Al men bolsam, jyldar boıy sabaq, ýnıver, keıin jumys degen syltaýmen tań namazyna tura almadym. Jáne ár joly ishimnen: «Bir kúni báribir oıanyp, bárin ózgertermin» dep qoıatynmyn. Sóıtip bir kúni álgi qarııamen sóılesip qaldym. Odan jumysy men kún tártibi jaıly suradym. Sóıtsem, men oılaǵandaı tańǵa deıin uıyqtamaı júretin adam emes eken. Kerisinshe, jumysynyń qıyndyǵyna baılanysty túnde kesh jatady. Soǵan qaramastan, ár tań saıyn birneshe saǵat uıyqtap bolsa da turyp, azanǵa barady eken. Bul joly óz-ózime eshteńe aıta almadym. Sebebi eshqandaı syltaý qalmaǵan edi. Kelesi kúni tańerteń, namazǵa turaıyn dep jatqanda, ishki daýsym aqyryn ǵana bylaı dedi: «Bul — Allanyń bir syıy. Ony kimge qalasa, soǵan beredi. Bir kúni Alla seni de týra jolǵa salar…» , dep qaıtadan uıqyǵa battym.

Namazym taǵy da qaza boldy. (Jalǵasy bar...)

«Fátátnı Sola» / Aýdarǵan Ersaıyn Qabylqanuly, «Áziret Sultan» meshitiniń naıb ımamy