MUSYLMAN ADAM NEDEN QORQÝY KEREK?
IMANSYZ ÓLÝDEN..
Eń kóp qorqý qajet bolǵan nárse osy bolý kerek. Adam ómir súrip jatqan osy dúnıe ómirinde ımanyn qorǵaı alǵan jáne ımanmen sońǵy demin bere alǵan bolsa, ol kisi baqytty. Osynyń ózi oǵan jetkilikti bolady. Bul baqytqa qaýyshqannan keıin búkil dúnıelik baılyqty tolyqtaı joǵaltatyn bolsa da, esh mańyzy joq. Allah saqtasyn, ımansyz ólgen kisi jasaǵan eshbir ǵıbadatynyń, eshbir jaqsylyǵynyń marapatyn kóre almaıdy, máńgi baqı tozaqta janady. Adam balasy múmkindikke qaraı barlyq nárseniń eń jaqsysyn, eń kórkemin alýǵa tyrysady. Úıdiń eń jaqsysynda turýdy, kóliktiń eń jaqsysyna minýdi qalaıdy jáne osy sııaqty nárselerdiń eń qundysyn ózine laıyqty dep sanaıdy. Bularǵa qol jetkizgende baladaı qýanady... Ólimniń de eń jaqsysyn tańdaý kerek. Al ólimniń eń jaqsysyna jaqsylap ómir súrý arqyly qol jetkizý múmkin. «Adam qalaı ómir súrse, solaı óledi. Qalaı ólse, solaı tiriledi.» Al munyń terisi óte sırek kezdesedi.
Rabbymyzdyń pendesine bergen eń úlken nıǵmeti – onyń ımanmen qabirge kirýi. Budan artyq nıǵmet pen baqyt bola almaıdy.
Kúná isteýden qorqý... Kıramán katıbın perishteleri bizdiń barlyq amaldarymyzdy jazyp jatyr. Ahırette bizdi uıatqa qaldyratyn jáne azaptalýymyzǵa sebep bolatyn kúnálardan qatty saqtanýymyz kerek. Jasaǵan kúnálarymyzdy biz umytýymyz múmkin, biraq perishteler umytpaıdy, bárin jazyp saqtap qoıady. Qııamet kúni amal dápterimizde esebimizde múldem bolmaǵan kúnálarymyzdy kóretin bolsaq, buǵan tań qalmaıyq.
Shaıtannyń amaldarymyzdy buzýynan qorqý... Shaıtandar bizge kúná istetkizýmen shektelip qalmaıdy, jasaǵan ǵıbadattarymyzdy da buzýǵa, joıýǵa tyrysady. Jasaǵan amaldarymyzdy bizge unatqyzyp, osylaısha bizdi tákápparlyqqa, menmendikke ıtermelep, saýaptarymyzdy óshirýge tyrysady.
Ázreıil aleıhıssalamnyń rýhymyzdy kenetten alýynan qorqý... Adam qashan óletinin bilmeıdi, kez kelgen sátte ólýi múmkin. Sondaı kúnimiz keledi, ol kúnniń keshin kóre almaımyz. Nemese sondaı bir túnimiz keledi, biz úshin kúndizi bolmaıdy. Ertengi kúndi aman-saý qarsy alatynyna eshkim senimdi emes. Jol apaty, júrek ustap qalýy sııaqty sebeptermen adam ómirimen qoshtasýy múmkin. Ertengi ómirimizge senimdi emes ekenbiz, olaı bolsa árdaıym ólimge daıyn bolyp júrýimiz qajet.
Dúnıeniń bizdi aldaýynan qorqý... Búkil jamandyqtardyń basy – dúnıelikti jaqsy kórý. Tákápparlyq, kóre almaýshylyq, kek saqtaýshylyq, dushpandyq, bireýdi aldaý, ótirik aıtý, bireýdi qorlaý sııaqty úlken kúnálardyń bári osydan týyndaıdy.
Hasan Basrı hazretteri Mýnafıqýn súresindegi: «Eı, ıman keltirgender, dúnıe ómiri senderdi aldatpasyn» degen aıatı karımany oqyp, tyńdaýshylarǵa: «Bul sóz kimniń sózi ekenin bilesińder me? Bul osy dúnıeni jaratqan Rabbymyzdyń sózi. Ózi jaratqandyqtan, dúnıeniń qandaı ekenin bárinen jaqsy Ol biledi...» degen eken.
Raýshan TÁÝIRQANQYZY
