MEIIRIM TÝRALY ÁFSANA
Tańǵy sýyq qoıny-qonyshyna deıin kirip, óne boıyn dirildetip barady. Gazet satatyn sary bala qatty tońdy. Qarny ashyp, áli bitti. Ol kúnige gazet satyp, kórshi aýyldaǵy mektepke qatynap oqý úshin nápáqa tabatyn. Óıtkeni, onyń aýylyndaǵy mektepte joǵarǵy synyptar joq bolatyn.
Ash ózegine túsip, sansyraǵan bala jaqyn mańdaǵy bir úıdiń esigin qaqty. Uıatty jınap qoıyp bir úzim nan bolsa da surap jemekshi. Biraq esikti ashqan kezde ol qysylyp, tek sý suraıdy.
Esik ashqan áıel balanyń túrine qarap onyń ash ekenin birden túsindi. Ol sýdyń ornyna bir staqan sút ákelip berdi. Bala sútti bir demmen sarqyp ishti. Sosyn:
- Sizge sút úshin qansha tóleýim kerek? – dep suraıdy.
- Qajet emes, – dedi jyly jymıǵan áıel, – meni bala kúnimnen jaqsylyq úshin aqy almaýǵa úıretken.
- Endeshe... Siz úshin únemi duǵa jasaıyn, – deıdi bala úni shyǵar-shyqpastan.
Úıden aýlaqqa ketkende kúsh-qýaty artyp, ózine degen senimi nyǵaıa túsedi. Jalǵyzdyń jary Qudaı ekenin moıyndap, eń bir qınalǵan sátte ol árdaıym kómektesetinin sezinedi.
Sodan beri kóp jyl ótedi. Bári ózgeredi. Bir kezdegi jas áıel qartaıyp, samaıy aǵaryp, shaý tartady. Dert meńdep, aýyldyń dárigerinen esh sep bolmaıdy. Ony qaladaǵy aýrýhanaǵa aýystyrady. Sonda da derttiń sebebin eshkim taba almaıdy. Eń sońynda ataqty bir ǵalymdy shaqyrady.
Sol ataqty ǵalym áıeldiń qaıdan ekenin bilgen soń dereý jetedi. Bul baıaǵy gazet satyp, kúnin kórgen ash bala edi. Ol áıeldi tanyp qoıady. Oǵan kómektesý úshin qolynan kelgenniń bárin jasaıdy. Em uzaqqa sozylady. Biraq sol dárigerdiń arqasynda qart ana jazylyp shyǵady.
Em bitken soń dáriger sol keıýananyń emdelý aqysyn aldymen ózi kórgisi keletinin aıtady. Tólemaqyny kórgen dáriger onyń ústine birdeńe jazady da, ony áıelge aparyp berýdi ótinedi.
Keıýana tólemaqyny kútip mazasyzdanady. Bul em tym qymbatqa shyqqanyn ishteı eseptep, bar jıǵan tergenin satý kerektigin túsinedi.
Oǵan tólemaqyny ákelgende, ol Allaǵa syıynyp otyrǵan edi. Tólemaqyǵa muqııat qarap otyryp, sandardyń ústinen jazylǵan jazýdy oqıdy. «Tólemaqy bir staqan sútpen tólengen» dep dáriger qolyn qoıypty.
Keıýananyń kóńili bosap, kóz jasyn syǵyp alady. Baıaǵydaǵy ash bala men oǵan bergen bir staqan sút esine túsedi.
Moral.
Júregińiz súıispenshilik pen meıirimniń qutty mekeni bolǵaı! Ony aınalańyzdaǵy jaqyndaryńyzben bólisýdi umytpańyz. Bir qaraǵanda álem qatygez ári aıar bolyp kórinedi. Biraq bul tek bir qaraǵanǵa ǵana. Eger sol álemge Siz meıirim men mahabbat syılasańyz, onda sol álemnen on eselep qaıtarym alasyz.
Álem degen ol sizdiń júregińizdiń túbindegi sarqylmaıtyn meıirim shýaǵy.
Aýdarǵan Shynar Ábildá
