ERTEŃGI ÓNIMIŃ – BÚGINGI QAREKETTIŃ NÁTIJESI...
Shyǵystyń bir elinde han qartaıyp, taq muragerin izdeýdi bastaıdy. Biraq ol tańdaýdy óz ýázirleriniń arasynan emes, halyqtyń ishinen izdeıdi. Bir kúni handyqtaǵy barlyq jas jigitterdi jınap, sóz bastaıdy.
«Men qartaıdym, ketetin ýaqytymnyń jaqyndaǵanyn ishim sezedi. Senderdiń barlyqtaryńdy jınaǵan sebebim, kelesi han senderdiń ishterińde. Qazir men senderdiń barlyqtaryńa bir-birden tuqym beremin. Ol tuqymdar erekshe, árqaısysy ártúrli. Maǵan senderdiń ol tuqymdy otyrǵyzyp, baptaǵandaryń kerek. Bir jyldan soń osynda ónimderińmen qaıta oralasyńdar, men salystyryp, aralaryńnan handy taǵaıyndaımyn», – deıdi.
Sol kúni jıynda bolǵan Ramazan esimdi jigit te han bergen tuqymdy úıine ákelip, sheshesine bolǵan jaıdy aıtady. Anasynyń járdemimen olar tuqymdy otyrǵyzady, kúnde sý quıyp, gúlzardy bir kúni terezeniń aldyna, bir kúni taza aýaǵa shyǵaryp baptap júredi, biraq sonda da odan eshteńe ónip shyqpaıdy. 2 apta, 5 apta ótedi, eshteńe qaraımaıdy. Arada taǵy biraz ýaqyt ótedi, Ramazan gúlzardan kúderin úzip, óziniń sátsizdigine nalyp, qınalady. Ýaqyt óte beredi.
Mejeli kezeń de kelip jetedi. Han jınalýdy buıyrady. Ramazan bos gúlzarmen barýdyń kúlkili ekenin sheshesine qansha ret aıtsa da anasy: «Baryp, shyndyqty aıt, balam. Ár túp shóp Qudaıdyń buıryǵymen shyǵady. Seniń baptaýyńda kemshilik bolǵan joq», – deıdi.
Qatty uıalsa da anasynyń sózinen attamaıtyn Ramazan bos gúlzardy qushaqtap saraıǵa keledi. Ishke kirgennen ártúrli gúlzarlarǵa salynǵan ádemi, bıik gúlderdi ákelip turǵan ózi sekildi jastardyń artqy jaǵyna kelip turady. Ramazan gúlzaryn jerge qoıǵannan bastap aınalasyndaǵylardyń kekesin kúlkisinen qyzara bastaıdy. Keıbireýleri aıanyshty qarap, basý aıtyp jatady.
Ishke han da kelip, jastardy qurmetpen qarsy alady. Ramazan sońyna qaraı jylysyp, tyǵylýmen bolady.
Han: «Jaraısyńdar, órender! Netken ádemi gúlder! Iisteri saraıdyń ishin túgel alyp tur eken. Búgin senderden bireýiń murager bolady», – deıdi.
Gúl toly gúlzarlardyń arasynan bos gúlzardy baıqaǵan han onyń ıesinen aldyǵa shyǵýdy suraıdy. Uıattan kirerge jer tappaǵan Ramazan qyzaryp, bir jaǵynan úreılenip, bir qadam aldyǵa shyǵady.
– Atyń kim?
– Ramazan
– Senderdiń kelesi handaryń – osy Ramazan. Osydan dál bir jyl buryn men barlyqtaryńa tuqym berdim. Biraq ol tuqymdar sýǵa qaınatylǵan edi, olardyń kókteýi múmkin emes bolatyn. Senderdiń barlyqtaryń alqyzyl ádemi ónimder ákeldińder, barlyǵyń tuqymdy aýystyrǵansyńdar. Tek Ramazan ǵana bos gúlzarmen óz tuqymymdy ákeldi. Onyń bul qylyǵyn úlken erlik dep eseptep, han taǵyna Ramazan laıyq dep taptym, – depti.
...Ómirdiń zańy árqashan ádiletti.
TÚIIN:
Eger sen shyndyqty ekseń, senimdi tabasyń.
Eger sen jaqsylyq ekseń, dos tabasyń.
Eger sen keshirim ekseń, kelisim tabasyń.
Eger sen shydamdylyqty ekseń, jeńisti tabasyń.
Sondyqtan, aǵaıyn, búgin ne egip júrgenińizge basa nazar aýdaryńyzdar. Sebebi erteńgi ónim – búgingi qarekettiń nátıjesi.
