Dýlat BABATAIULY: QYLYǴYŃ QYLJAŃ, TÝYSQAN...

Qylyǵyń qyljań, týysqan,

Qyrt penen myljyń aǵaıyn,

Bárinen de daýasyz,

Ósekti qaıtip baǵaıyn?

Maqtan, kúıshil búrkitteı

Babyn qalaı tabaıyn?

Jaǵympaz sóz ár kimge

Jumsaıtuǵyn malaıym,

Arasynan jem taýyp

Bári tegin jer tezek,

Qaısysyn tańdap alaıyn?

Esil sózden pul ketti,

Kelemej qylyp atasyn,

Almaı aqyl, batasyn,

Moıyna almaı qatasyn,

Sharýa dese jıreńdep,

Ósek dese súıreńdep,

Qymyz ańdyp qydyryp,

Beıpil sózge sydyryp,

Jalań bastanyp ul ketti.

Aǵaıyn araz mal úshin,

Ańdysyp aldy abysyn;

Jattaı bolyp tanysyń,

Qazaqtan múlde túńilip,

Artyńa qarap úńilip,

Qaıran talaı jyl ketti.

Ańdyǵany malyń bop,

Tilegeni bulyń bop,

Momyńdy soryp súlik bop,

Aram daýǵa kelgende

Jel jetpeıtin kúlik bop,

Qonaqasy bermese,

At - shapanǵa ilik bop,

Parany kózdep baı ketti.

Sózden ketip pátýa,

Baznań júrmeı tatýǵa,

Ańdysyp quda súıekpen,

Kóterip tastap ıekpen,

Qadyr - qasıet is ketti.

Eskiden qalǵan burynǵy,

Patýaly yrymdy,

Adaspastaı dańǵyl sol -

Qasym salǵan qasqa jol,

Sharǵa soǵyp iz ketti.

Bermeseń, jaqyn jaý bolyp,

Bermeseń, qurǵan aý bolyp,

Aıaǵy pále daý bolyp,

Ulǵaıyp pále qaý bolyp,

Tatqan dám men tuz ketti.

Kúzeme baıtal kekildi,

Jetekshil túıe sekildi,

Sheshe aıtsa keıin dep,

Jeńgesi aıtsa beıimdep,

Kıimin tastap qyz ketti.

Qonysyna qona almaı,

Sharýalary ońalmaı,

Baı men kedeı ańdysyp,

Aralasqan san pysyq,

Dóń asqan maly tabylmaı,

Birine - biri senispeı,

Keshirim jasap kelispeı,

Bet - betimen el ketti.

Durys bastar basshy joq,

Ádiletke shóldetti,

Tatýǵa ósek júrgizip,

Páleniń otyn órgizip,

Qaıran zaman, aman bol,

Er shógip, eser er jetti.

Dýlat BABATAIULY (1802-1874)