ОҚШАУ ОЙ

Бәрімізге белгілі. Мұсылман атаулыға анық: Алла бар. Және Ол жаратқан әлем бар. Осы себепті біз Оны — Жаратушы Ие деп танимыз.

 

Енді сауал: Біз Алла Тағаланы қалай танимыз?

Жауап: Пайғамбарлар арқылы.

Тағы бір сауал: Біз Алланы қалай жоққа шығарамыз?

Жауап: Білім арқылы.

 

Осы қарапайым сұрақтар мен жауаптардан-ақ білім иесінің кім екендігін бағамдауға болады.

 

Сіз дүниедегі ең ақымақ адамның кім екенін білесіз бе?

Айтпау – қылмыс. Себебі, ауруын жасырған өледі. Біз өлдік.

Жоқ, ауруымызды жасырғандықтан емес,

Оны ауру деп білмегендіктен.

Бұл – жүрек өлімі.

Жүрек өлген кезде адам мен Алланың арасындағы байланыс үзіледі.

Ал оны үзген – біз иелік еткен білім.

 

Түсінгенге – бұл зұлмат.

Себебі дүниедегі ең ақымақ – бір нәрсе білетіндер.

Неғұрлым көп білген сайын олар ақиқаттан алыстай түседі.

Өйткені бұл әлемде ақиқат жоқ.

Ал оны бар дейтіндер – сол білетіндер.

 

Қайғылысы – біз соларды ұлықтап келеміз.

Бұл – адам баласының ең үлкен қателігі.

Өйткені біз соңына түскен білім – тек атау ғана.

Ол – білім емес,

Ол – шайтанның торы.

 

Егер байыбына барсақ, кез келген ілім, нақты айтсақ, ғылым – Аллатануға қызмет етуі тиіс.

Себебі Одан өзге еш нәрсе жоқ.

Жаратылғаннан Жаратушысын таппаған,

тіпті Оны жоққа шығарған ғылым – ғылым ба?

 

Біз дінсіз қоғам – КСРО-ның мектептерінде өстік.

Ботаника, физика, химия, математика, ана тілі...

Бұл пәндер сол қалпы қазір де оқытылады.

Сол білімдер – адам болмысын қалыптастырады.

Біз – сол қалыпта болдық.

Өскелең ұрпақ та сол.

 

Неге? Себебі бұл пәндер иман қалыптастырмайды.

Себебі ол білімдерде Алла жоқ.

Сонда ол қандай білім?

Байыбына барсақ, әр пән, әр сала – Алланы танытатын жол болуы керек еді.

Әрбір ғылым – Аллатануға қызмет етуі керек.

Солай болмаған ғылым – шынайы ғылым емес.

Ол – адасқан адамның ізсіз сүрлеуі.

 

Өзі зерттеген саласынан Алланы көре алмаған ғалым –

ғалым емес.

Ғылымға өмірін сарп етсе де, ақиқатқа жетпеген адам –

іздегенін шайтанның ойынан тапқан адам.

Өйткені ол ілім емес,

ол – иллюзия.

 

Кейде стандартты ойлау жүйесінен шығып,

ағыспен бірге аға бермей,

судың қайдан келіп, қайда құйылып жатқанын ойлаған абзал.

 

Бәрімізге белгілі, КСРО құрамына кірмей тұрып, біз "сауатсыз" едік.

Ал КСРО – дінсіз қоғам.

Біз ол қоғамға білім арқылы кірдік.

Ол білім бізді сол қоғамның адамына айналдырды.

 

Сол жол – қаншама ұлтты жойды.

Адам табиғи ұлттық танымынан ажырады.

Сол соқпақ қазір жаһандануға ұласты.

Ол да — сол білімнің салдары.

Білім – сол жүйеге қызмет етуде.

 

Ал оның иесі кім?

Ол – ортақ қазан.

Сіз сол қазанның иесін білесіз бе?..

 

Сол иеге қызмет ететін білім – хусули, яғни сыртқы, материалдық ілім.

Ал адам табиғатына тән – хузури ілім.

Ол – жүректен.

Ол – болмыс арқылы танылатын.

 

Алла адамды кемел күйде жаратты.

Сондықтан адам – оқу-білімге мұқтаж емес.

Оған тек – өзін таныса болғаны.

Құдияр БІЛӘЛ